ضحكة من القلب عفوية تخرج من صدري ، عندما انسي سني ، وانزل من فوق سنوات عمري ، وألعب مع أولادي الصغار ، وهم يكونوا بذلك اكثر سعادة مني عندما اشاركهم لعبهم على الإكس بوكس ، والأكس بوكس للي مايعرفش، حاجة طلعت بعد البلاي ستشن ون و تو ، واللي مايعرفش البلاي ستشن، دي حاجة طلعت بعد الاتاري، واللي هيقولي مأعرفش الاتاري ، أقوله ده انت تبقى عجوز قوي ، إيه اللي مدخلك على النت .؟؟؟؟

قد يكونوا شياطين ،ولكن ببراءة الأطفال يضحكون ، وبعفوية يعبرون عن ما يدور بداخلهم ، أضحك عندما يندمج الصغير معي في لعبة المصارعة ، فيقول لي ، هأكسر رقبتك يا بابا، إلحق بسرعة يا بابا إنت ماعندكش دم خالص ، دمك خلص وهتموت ، ، إبه رأيك في البوكس ده ، ؟؟ ده في مناخيرك عدل

او عندما نلعب فوت بوول ، وألعب لعبة على قدر امكانياتي المتواضعة ، فيشجعني الكبير بمجاملة واضحة، حلوة يا بابا ، فيرد الصغير المندمج ، حلوة إيه ...؟؟ دي وحشة جدا ! فيزغده الاكبر، عيب يا احمد ، ده بابا اللي لعبها لازم تكون حلوة حتى لو وحشة .!

بأشعر بداخلي أني دخلت إلى عالمهم ،فأنا ضيفهم ، وحق على المضيف ان يكرم الضيف ، أشعر فعلا اني بلا استئذان دخلت عالم أخر ، وهم يشعرون بذلك ، من كثرة الترحاب ، ومحاولة تعريفهم لي ما لا اعرفه في هذا العالم ، قد يشعرون بلذة من أن هناك أشياء هم يعرفونها، وبابا لا يعرفها، ولذة أكبر عندما يهموا في تعريفي على هذا المجهول عن بابا ، ، ويكتشوفوا ان ده بابا تاني غير اللي بيقعد يحفظنا القرآن أو اللي بيزعق دايما ،أو اللي عايز ينام واحنا عاملين دوشة ،

ويسألوني بشغف محاولة منهم للتقريب بين عالمهم وعالمي ،بابا !! لما كنت صغير كان في عندكم سبايدر مان ، ؟ طيب كنت بتحب شريك ؟ كنت بتتفرج على توم وجيري ؟؟ باباك يا بابا كان بيقعد يلعب معاك زينا كده ، لا انا بابا مات وانا صغير.. معلهش يا بابا معلهش ماتزعلش !!!

هذا يقول لي دي بتتلعب ازاي، والتاني يغششني ، ويبالغون في استئثارهم بمعلومة لا يخفونها عني ، والصغيرة بخبرة الكبار تأتي وتسيطر على القعدة ، وتقرر مين يلعب ومين يخرج بره اللعب، والكل يبدي لها كامل الاحترام والتقدير .
فعلا عالم العيال ، عالم تاني ، لو نزلنا لهم يمكن نفهمهم أكثر من أفعل ولا تفعل، نقرب لهم أكثر ، يشعروا اننا منهم ،

* * *

نسيت أني حاطط البلوج كا هوم باج ، من كام يوم استأذنني الصغير ، بابا ممكن افتح النت شوية ، قلت له ... مافيش مانع ، وبعد شوية جه وقالي لي ..
-في حاجة غلط في النت ،
-خير !!
- كل ما افتح يطلع لي جورج بوش !!
استغربت.... ما الذي جاء ببوش إلى كمبيوتري ؟؟ او كيف ذهب أحمد إلى موقع البيت الأبيض بهذه السهولة ؟
- جورج بوششش ؟ عندنا ...! إزاي ؟
- أيوه ، وهو قاعد يصّبع !!!!!

صعقت .. وضحكت .... وندمت