" تخيل نفسك عربة حنطور ، واكتب ما يراه السائح خلال تجوله في شوارع القاهرة "، السؤال ده جه في مادة اللغة الانجليزية في امتحانات الثانوية العامة ، على أيامي ، ساعتها عيال كتير مخها تخين مافهمتش السؤال، وأنا منهم ، الطلبة بدأت تفسر السؤال كل على قد فهمه ، منهم من قال

- عربة حنطور.. يعني انا حمار ؟

، واللي يقول

- طيب السؤال عايزني اشرح وأوصف الحنطور، وألا السائح ، وألا العربجي..

واللي يسأل

- إنجلزي ده يا مرسي ؟

ما فهمتش ليه الممتحن أراد أن يصعبها على الطلبة..(هي ناقصاك ياخويا، مش كفاية الهلمة دي كلها) لكن أعتقد ان في ناس ما ترتحش إلا لما تقعد تلف وتدور ، والموضوع بيخلص أشاسا في كلمتين ، زي ما انت شايف إن الغرض من السؤال واضح و بسيط جدا ، وكان ممكن يخلص في كلمتين " وصف الأماكن السياحية في مصر " ..بس واضع السؤال أراد ان يتفزلك (من الفزلكة ) ويقعد يلف ويدور لحد ما توه العيال ! ، بس نقول أيه ، في ناس ما يحلاش لها غير انها تجعلص الكلمات ، او تحور الموضوع ، او حتى تتكلم بكلمات مش مفهومة من الأساس ، علشان تفهم انه مثقف ، ومع ذلك الراجل عنده حق ، تقدر تقولي فايدة الامتحانات إيه إذا كانت مفهومة للطلبة ، والهدف منها إننا نفرق بين الطالب المذاكر والحمار ،
وأذكر هنا ، دخل معانا واحد في الامتحان التجريبي ، بكتاب الكيمياء كاملا.. وخرج مبسووووط على الاخر ، ها عملت ايه يا كمال ...قالت ما سيبتش سطر إلا ونقلته .. يعني إن شاء الله ناجح غصبن عن عنيهم ، ولكم كانت صدمته قوية عندما عرف انه الامتحان كان لمادة الأحياء ..مش الكيميا .
والشيء بالشيء يذكر..كان معانا في اللجنة ابن د. محمد علي محجوب الله يمسيه بالخير، وزير الأوقاف الأسبق المبتسم دائما، وحصل على مجموع 73% (الابن طبعا) وسنتها..دخل كلية طب القاهرة!...مش عارف إزاي . بس الواضح انه كان عنده واسطة في مكتب التنسيق ، موظف أو فراش ، او أمين شرطة..! أرزاق..حد يعرف واسطته كانت مين ؟

الخلاصة .. دلوقت وبعد اربعين سنة من امتحاني للثانوية العامة، لاقيت ان السؤال ده عبقري فعلا,, وسؤال ينشط حركة مخ الطالب ، بدل نظام الصم ده، يعني النهادرة لا نستبعد واحد يجي يسألنا .. تخيل نفسك حمار وأوصف حجم الألم الذي تتلقاه في مطلع ! او تخيل نفسك بلاعة مفتوحة في إحدى شوار ع القاهرة ، واكتب عما تبلعه يوميا، تخيل نفسك سيجارة واكتب عن مضار التدخين ، والفرق بين الشفاه الحريمي والرجالي.. والفرق بين السيجارة الكينت و السبارس (اعقاب السجائر ) .
او مثلا تخيل نفسك صرصار في حمام واكتب ما تقابله من مصاعب يومية مع الفيليت والشبشب ابو فيونكة . أو لو مزاجك عالي قوي ... تخيل نفسك عصاية مقشة في قسم شرطةّ !

دلوقت ، وبعد المدة دي كلها، اكتشفت مدى عبقرية سؤال زي كده ، يطلع كل مكنونات الكاتب السريالية ليكتب عن راي جماد فيما يراه - مجازا - او ليعبر عن شعور عميق داخلي لدي الكاتب لا يجرؤ ان يبوح به لاحد ، ولكن عذاب الضمير يقتله يوميا ليدفعه ان يعلن انه حمار .. او فردة شبشب مثلا... او بالعكس.. يتخيل الكاتب ما تمنى ان يكونه ولكن اضطره الزمان للعمل بالمثل " على قد لحافك مد رجليك" .


انا بقا تخيلت نفسي ديك رومي ، في الفرن ، .ومحشي كمان . سيحكي لنا عما راه في بيت سنية وعبد الفتاح

وبداية لابد منها ....

عادة يكتبون في نهاية الأفلام الواقعية او بدايتها " شخصيات هذه القصة ليست لها علافه بالواقع " ، ويضيفون عليها، واي تشابه بين شخصية من شخصياتها إنما بمحض الصدفة ، وانا اريد ان أضيف ؟؟ان لها علاقة بالواقع ، و أي شخص يجد تشابه بينه وبين أي شخصية في القصة ...يتفلق ، يخبط دماغه في الحيط .... مع كامل احترامي له طبعاً، لان مش ذنبي أنه كده .
والقصة كاملة في الموضوع القادم ...إن كان لينا عمر، وإن لم يكن ....فا في الموضوع بعد القادم .