أُكتـــب بالرصـــــاص

Mar 24, 2007

المركب بتغرق يا قبطان

هي صيحة أطلقها مساعد قبطان العبارة الغرقانة من أكثر من سنة وعلى متنها أكثر من ألف مصري، وسمعناها من خلال تفريغ لشريط الصندوق الاسود والمهبب على عينه ، ونفس الصرخة يطلقها الان كل قوى المعارضة في مصر ، مصر بتغرق يا قبطان ..مصر بتغرق .
.
بل وذهب المعارضون إلى اكثر من ذلك عندما شيع طلبة جامعة القاهرة مصر في جنازة رمزية ..وسيكتب التاريخ إن مصر غرقت يا قبطان في هذا العهد السعيد ..هذا إن لم يلطف بنا الله ويلحق المركب بمن عليها.
.
المركب بتغرق يا قبطان .... المركب غرقت يا قبطان... وكان هذا بفعل فاعل ...وغول كبير له أيادي كثيرة ...اسمه الفساد .. والان مصر بتغرق يا قبطان بفعل نفس الفاعل ..نفس الغول ..اللي بيفصلوا له فستان على قده، ليطلقوا له العنان ليأكل في البلد وفي خيراتها وفي أولادها ...وكله بالدستور .
.
هناك قوانين يسمونها ...قوانين سيئة السمعة ، مثل قانون الطوارئ وقانون الإشتباه ، والأن مع التعديلات الدستورية ... القوانين دي هاتبقى شرعية ودستورية وماحدش يقدر يقولنا سلامات يا ام أحمد .
.
أي واحد ما كملش تعليمه ودخل تسع شهور يتعلم امانة الشرطة ..وخرج معلق اي زرار نحاس فوق كتفه سيصبح من حقه انه يهبدك من قفاك عالقسم ، أيا من تكون بدون إذن ولا إحم ...وبالدستور.
.
اثناء إشراف القضاء على الانتخابات شاهدنا حجم التجاوزات والتزوير، تخيل بقا بعد تعديل الدستور وقعدت القضاة في بيوتهم ، بالاضافة ان ماحدش يقدر يترشح إلا عن طريق حزب ..، وتفتكر مين اللي بيوافق على تأسيس الاحزاب ؟!!!! اه يا حزني ...! كل شيء مطبوخ...بس عالله ماحدش ينخرب ورانا!!!!
.
المركب بتغرق يا قبطان ... المركب بتغرق!
تحديث..مراسلينا في اللجان
شاب باين عليه لسه قابض عشرين جنيه ماسك يافطة تأييد وموافقة وعمال يهتف بحماس..
المذيع : انت تعرف كام مادة بتتعدل
الشاب(بعد تفكير واحرااااج كبير) ملاقاش غير انه يقول : لا
المذيع : طب تعرف ايه هى الماده 179
الشاب : لا
المذيع : طب تعرف ايه الماده 88
الشاب : لا
المذيع : امال بتصوت على حاجه انت مقرتهاش
الشاب : اصل انا مع الشعب
.
المراسل بيسأل واحد انت صووّت
المواطن المصري : لا.. عندى مشوار
المراسل بيسأل واحد تاني : رحت تصوت ؟
المواطن المصري : عندى مصلحه بقضيها

المراسل بيسأل واحد داخل للجنة : هاتعمل ايه ؟
المواطن المصري : ننتخب الريس وفتحى سرور
ده غير كم الستات المتخلفات اللي طالع عليهم " طبعا ناوية اروح اصوت علشان التعديلات هاتعطي حرية اكبر للمرأة وتمثيلها في البرطمان " ، " الرئيس والمجلس مابيعملوش حاجة غلط ، واكيد كله في مصلحة الشعب" .
ياما .... غطيني وصوتي (وماتنسيش الحبر الفوسفوري)

Posted by أُكتب بالرصاص :: 5:21 PM :: 68 Comments:

Post / Read Comments

---------------oOo---------------

Mar 18, 2007

البيت مش بيتك

كلما شاهدت برنامج حالة خوار ، وفي رواية حالة حمار، او البرنامج السمج للمذيع الأكثر سماجة تامر بسيوني البيت بيتك ورغم أن كل الشواهد حوليا لا تعبر عن هذا ، تسألت ..هل صحيح البيت بيتي ؟ تعالوا نشوف :

- إزاي طالب مصري وإتعلم على ارض مصرية ، لما يجي يدخل الجامعات المصرية ، يقولوا له ..لا..مانتش داخل .. لان اهلك عرفوا يربوك ، ودخلوك مدارس تهدف إلى الارتقاء بعقلية الطلبة بأسلوب امريكاني ، هذا حال طلبة مدارس المنهاج الامريكي ، عايزيين يعاملوهم معاملة الاجانب في الجامعات ، وكل جزاءه ان اهله رفضوا مجانية التعليم وتركوا مكانه لواحد أخر في المدارس الحكومية وأرادو أن ينتفع الولد والبلد بنظام تعليمي متقدم ...
فلسان حالهم يقول "لا..طالما دخلت عيالك مدارس اجنبية ...يبقا البيت ده مش بيتك " .






- يحكي لي صديق ذو منصب رفيع ، أنه في إحدى رحلاته إلى الخارج في مهمه رسمية ، وبالطبع على شركة مصر للطيران ، الفيرست كلاس ،
لم يكن هناك غيري وزميلي على هذه الدرجة، ثم صعد طقم أخر لمصر للطيران ، وملؤوا بقية مقاعد الدرجة، طالعين يجيبوا طيارة اخرى ، يعني زي توصيلة الكمسارية في الاتوبيسات ،
طلبت من المضيفة المصرية ، التي تناهز الخمسين مثلها مثل مذيعات الفضائية المصرية الذي أكل عليهن الدهر وشرب (مش بس كده ، ده أكل ..وشرب.. وبال.. وريـح على الاخر حتى بططهن ولا أجدعها مكوجي رِجل)،
- ممكن جريدة لو سمحت،
- ردت بأدب جم......طيب
وانتظرت كثيرا، حتى جاءت بكومة من الجرائد والمجلات، ولكنها وزعتها على الطاقم الاحتياطي ، واستأثرت لأحدهم بكمية لاباس بها من الجرائد،
- لو سمحت أنا طلبت جريدة
- مافيش ...خلصوا
- إزاي خلصوا .. طيب ممكن واحدة من الاخ اللي معاه كبشة جرائد ! أو حتى لما يخلص قرائتها يبعتالي واحدة .
- إيه ...مش ممكن طبعاً ..ده الكابتن عصام.. مش ممكن أطلب منه كده
- يطلع مين الكابتن عصام ، أسمعي..انا دافع فلوس والفلوس دي هي اللي بتدفع لك راتبك...و
وهنا انقلبت المودمازيل اللطيفة المضيفة إلى أم شِحاته البلانة....ن ااااع ااام يادلعدي ي ي ي...راتبي.. انت ما بتاكلنيش من بتكو..انت ...انت ...انت....
مصر للطيران بتحييكم ..وبتقولكم ...حتى لو كنت دافع فلوس....البيت ده مش بيتك .

- لما يلموا معظم كبار رجال الأعمال الشرفاء ويرموهم في السجن ، ويسرقوا اموالهم واموال عيالهم ، وكل ذنبهم انهم صدقوا ان البيت بيتهم ورفضوا يهربوا فلوسهم واعمالهم بره البلد، وفتحوا بيوت ناس وحركوا عجلة الاقتصاد جوة المحروسة، ولما يروعوا زوجاتهم وامهاتهم وعيالهم ، بيفكروني بالمخبرين بتوع زمان لما يروحوا يفتشوا البيوت ويضربوا في جيبوهم أي حاجة يلاقوها .. انت جاي تعتقله علشان بيعتنق فكر معين ..مالك انت ومال فلوسه..يا حرامي . مش دي تبقى رسالة مفادها " البيت ده مش بيتك..إذا كنت نضيف روح استثمر بره منك له "





-ذهب أحد الاصدقاء بصحبة زوجته التي ترتدي الحجاب إلى احد المطاعم الفاخرة المطلة على النيل بعدما حجز بالتليفون مكان للغدا، وبعد دخوله ، فوجئ بشاب مهذب يعمل في المطعم،يقترب منه ويهمس في أذنه ، في أدب" أهلا بك ، بس معلهش يا فندم، الدخول هنا لازم بالملابس الكاجول " ففكر صديقي وقال في ذهنه، عايزني اجي بشورت وألا ايه ؟ حتى فطن بعدما نظر في عين الشاب ولمح مقصده وهو ان الحجاب غير مرغوب فيه أو بمعنى اخر " لو سمحت يا حضرة ..زوجتك محجبة!..يبقا ..البيت ده مش بيتك "




- مجموعة من خيرة شباب بلدنا ، بيندبحوا بدم بارد ، واللي دبحهم بيقولك.. احنا دبحنا ولادك والدليل أهوه صوت وصورة، واحنا نقول له ، ياراجل ما تكبرش الموضوع خليك رولاكس كده، زي ما بيقول مصطفى الفقي، دول قتلي حرب، مش أسرى، او مفيد شهاب بيقول ..لو ثبت انهم اسرى ... ها .. مش عارف ايه ، وابو الغيط بيقول لك .. ياراجل ..هو ده سبب برضه علشان نقطع علاقتنا مع جيرانا ، ؟ أهالي الأسرى بيطالبوا بحقهم ، الاسرى الناجيين ..عايزين تعويض كرامة... ويأتي الرد.. " جرا ايه منك له .حقوق ايه اللي جايين تطالبوا بيها يا ابو حقوق .انت صدقت نفسك وألا أيه.....البيت ده مش بيتك "
- كذا مليار جنيه ، هو دخل الدولة من تحويلات العاملين في الخارج ، ويعتبرون من مصادر الدخل القومي ومع ذلك..تعالى شوف بيعاملوهم ازاي ،
قلة أدب في استقبالهم في المطار، ويعاملك على انك مهرب حتى يثبت العكس، وإذا ثبت ، يبقا انت مهرب شاطر وعرفت تزوغ منهم ، ويا ويلك لو جايب فيديون او أي اجهزة كهربائية
قلة أدب في توديعهم من المطار ، وربطهم من عنقهم بحاجة اسمها تصريح العمل، جيت على هواهم.. أخذتوا ومشيت، مش على هواهم ..ياويلك ..دوخ بقا، بالإضافة إلى المعاملة في أي مصلحة او وزارة لتجديد ايه حاجة ، ابجني تجدني ، ونظام ..انت جاي من بره،،يعني اهرش هتزنل بلاوي ...
بصريح العبارة ... بياخدوا خيرهم ، ويقول لهم .."هات حسنة وانا سيدك وماتجيش تاني .. البيت ده مش بيتك "

واخيرا أقول ....

إلى كل فاسد وكل منحرف ...إلى كل حرامي وكل منتفع .... عفوا....البيت ده بيتنا ، والبلد دي بلدنا....غصباً عنكم .


Posted by أُكتب بالرصاص :: 9:24 AM :: 67 Comments:

Post / Read Comments

---------------oOo---------------

Mar 3, 2007

سينيمائيات

يسر أفلام حسن البربور أن تقدم لكم باكورة إنتاجها الفني

فيلم حب في البلكونة

موسيقي تصويرية : فرقعة مع صوت ضربات طبل متعاقبة
لقطة : الكاميرا مثبتة فوق سطوح إحدى البنايات وبتعمل كلوووز على بلكونة في العمارة المقابلة في الدور السابع .
قصة درامية واقعية ( لان البطلة بتقع من البلكونة في نهاية الفيلم )
لقطة : طرطشة دماء على الكاميرا ورقبة تطير على الاسفلت
حب في البلكونة قصة تدور أحداثها بالكامل من داخل البلكونة ، قصة من الفول كلور الشعبي المصري
كلوووز على طبق الفول اللي البطل والبطلة بيتعشوا بيه داخل البلكونة ،
حوار:
البطل : إيه القرف ده ..الفول طعمه عامل كده ليه....!
البطلة : ابدا يا حبيبي.. الظاهر وانا بأغسل الهدوم ، شوية كلور وقعوا على قدرة الفول .ماتاخدش في بالك ..اهوو كله مطهر .
البطل (يتف في وش البطلة، ويناولها بوكس في وشها ويمسك طبق الفول ويدلقه على راسها) : أسفوخس ، هي جوازة باينة من أولها.. عيلة رمة .. جاتكم القرف.

صوت : وهكذا يلعب الفول والكلور دورا رئيسا في تغيير قصة الحب التي جمعت بين القلبين في أقوى دراما فول كلورية مصرية


بدأت مأساة لوزة (بطلة الفيلم) لما خرج فرقع(جوزها الانتيم ، وفي نفس الوقت بطل الفيلم) لعمله اليومي كسائق على مكروباظ ومارجعش حتى نهاية الفيلم .
لقطة : فرقع قاعد على القهوة بينادي على الولا رزة صبى القهوجهي : واد يا رزة الشاي الكشري فين يابن الفقرية ...وريا شغل .
يدخل الولا رزة مع صوت موسيقى تصويرية من طلقات مدفع ،
كلووز على رزة وستوب متتابع حتى يستقر الكادر على وشه مع تبديل الصورة إلى الابيض والأسود
صوت : هل لرزة يد في تحويل مسار الفيلم ..هل له دور في الحبكة الدرامية ...!!هل كانت كوباية الشاي ملوثة فتسمم البطل ونقل إلى عنبر الحميات بالقصر العيني ؟ هذا ما ستكتشفه عزيزي المشاهد من متابعة الفيلم.
حب في البلكونة
الفيلم الذي أعترضت عليه الرقابة وفلت باعجوبة من تحت مقص الرقيب ، ليعرض عليكم بلا حيا ولا خشا (لان اللي اختشو...راحو يتعالجوا في التأمين الصحي ولسه ما رجعوش)
حب في البلكونة
الفيلم الذي أعترضت عليه هيئة الاسكان والمحافظة ، لان البلكونة داخلة في صميم عمل الهيئة والمحافظة
الفيلم الذي أعترضت عليه جميع الهيئات الشرعية بدعوى انه لا يجوز المجاهرة بالحب ...فما بالك بقا لو كان في البلكونة
حب في البلكونة
الفيلم الذي اعترض عليه الممثلون لانهم اكتشفوا بعد انتهاء التصوير انه فيلم اخر غير المكتوب في السيناريو وكان اسمه "عزوز وعزيزة ودورهم في العولمة اللذيذة ".
حب في البلكونة
الفيلم الذي اعتذرت عن القيام بدور البطولة فيه أكبر النجمات بداية من سنية مال الهوى، توفيقة سيلكون، رجاء كله على الله ، عزيزة نفخو ، وقبلت دور البطولة اخيرا الفنانة الصاعدة (نعيمة مأقدرش) ليكون أولى افلامها بعد النيو لوك وعودتها من عند حنفي العجلاتي.

كاااااات (فقرة إعلانية )
_________________________________
يقطع الاعلان عن الفيلم ليذاع فقرة إعلانية عن الحلة الذكية التي تحتاج إليها كل ست بيت ، أما ستات الشوارع مش محتاجينها لانهم دايما بيتعشوا بره ،
الحلة الذكية ، تصدقوا انها تقدر تسوي الرز ولا تحرقهوش، بالاضافة أنها ممكن تطبخ الفاصوليا والبامية ، الحلة الذكية ، عدة مقاسات وبألوان واحجام تناسب كل الاسرة ، بالاضافة انها حاصلة على شهادة الجودة من اكسفورد ....بدرجة مقبول .
أتصل الأن لتحصل على هديتك ...غطاء واحد لطقم الحلل كامل، والهدية المفاجأة ...معلقة خشب وجوانتي قماش
طقم الحلة الذكية ضروري لكل ست بيت عايزة تحافظ على جوزها (باعتبار أن الرجالة دايما همهم على بطنهم ) ولو ما اتصلتيش الان واشترتي طقم الحلة الذكية ، جوزك ممكن يبص بره يدور على واحدة عندها الطقم .

وبعد ربع ساعة من وصف مزايا الحلة الذكية نرجع للاعلان الأصلى عن الفيلم التاريخي
_________________________________

حب في البلكونة
فيلم الاسقاطات السياسية والانكسارات
مشهد للبطل يمشي مطأطأ الرأس خارجا من قسم شرطة بولاق يحمل في يده عصاية المقشة
موسيقى تصويرية : وين هنادي يا اماي....! تات تاتاا تااي

مشهد أخر : لوزة تدور في الشوارع تبحث عن فرقع ، ممسكة بيدها علبة فيليت بترش بيها الذباب المتجمع على وشها ، وشعرها منكوش وجلبابها ممزق
فيلم الاثارة والغموض
ما سر الرجل الذي كان يمر من تحت البلكونة في نفس اللحظة التي كانت لوزة بتسقي الزرع بالجردل فيفلت من أيديها ويقع على رأسه فيشجها ،

هل كان هذا الرجل من جهاز المخابرات الاسرائيلي !!هل هو أحد الكومبارس دخل في الكادر غلط !!، ام انه عامل الكلاكيت ...!!! ام انه مجرد عابر سبيل . فيلم الفرفشة والدندشة ، والهز يا وز ،

لقطة : لوزة واقفة في البلكونة منتظرة عودة فرقع ، ويبدأ شباب البلكونات الأخرى في العزف على الدربوكة والأوكورديون والتشيلو ، وتبدأ لوزة في الهز تمضية للوقت في مشهد طليعي سيريالي مؤثر .(مشهد واخد حقه )
حب في البلكونة
هل ستحاول لوزة البحث عن زوجها المفقود هل ستنجح ؟
على من ستطلق الرصاص في حال وجدته مقتولا ؟
ما هو السلاح المستخدم !
كل هذه الأسئلة ستعرفون الاجابة عليها من خلال متابعتكم للفيلم
حب في البلكونة
فيلم يجمع كل عوامل السينما النظيفة ( المقشة ، الفيليت ، الجردل، الكلور) .

والأن نتركم مع الاعلامية الجهبذ هالة سرحان في استضافة حصرية لابطال الفيلم
ضحكة هيستيرية وتصقيفة تحث بها الجمهور الماجورعلى التصفيق مثلما يفعل فرس البحر ....وهي تقول ..." كل هؤلاء النجوم حصريا مع هالة شو لنحصد نجاح الفيلم اللي لسه مانزلش السوق أصلا ، ومعنا المؤلف حميدة الأهطل ، والمخرج المبدع جربوع الهايف" .

وعند هذا الحد ..أغلقت التلفيزيون .. قبل أن اصاب بالعته والتخلف العقلي .
ــــــــــــــــــــــــــــــ
تحديث :
البطلة: انت يا منيل على عينك مش حتصحى تجيب لنا قرطاس طعمية زهقنا من الفول
البطل: اتهدي يا ولية بتاع الطعمية لسة مقلاش اول طاسة و بعيدن الفيلم اسمه فول كلور مش طعمية كلور
البطلة: قطيعة تقطعك على المؤلف في يوم واحد كل يوم كلور كلور لما ابيضيت
البطل: يلا خليكي تنضفي---
ده احلى حوار عجبني في الفيلم الكونبلة و بسراحة مقتوب حلو خالس خالس خالس هي دي الافلام الواكعية بسحيح
هذه الإضافة من ....سمباتيك
ــــــــــــــــــــــــــــــ
تحديث : رأي النقاد
هذا الفيلم يتميز بقدرته المذهلة على التطابق مع الواقع من خلال منظور مختلف تماما،،،
الشخصيات داخل بؤرة الاحداث منحوته بعناية ونجحت فى أن تنقل لنا العلاقة الحميمية بين المكان والزمان
وحجم الصراع الميتافيزيقى الموجود فى البعد الثالث بين النزعة التشكيلية المفرطة فى جمالياتها والنزعة الواقعية الموجوده فى المكان اللى بيصل بنا لذراع مرسى اقصد البطل وما تسألنيش عن معنى أى كلمه لانى مش فاهمه حاجة .
الناقدة الفنية .... بعدك على بالي

Posted by أُكتب بالرصاص :: 1:54 PM :: 59 Comments:

Post / Read Comments

---------------oOo---------------