أُكتـــب بالرصـــــاص

May 28, 2007

حفل التخرج



بعد طول سهر ، ومذاكرة ، وقهوة داخلة وشاي خارج، وبرشام للسهر و بانجو ، وإعلان حالات الطوارئ في البيت للمذاكرة ، وفي الخلفية أغنية " أنام وتسهري وتباتي تفكري" ، وبعد مذاكرة ومحاضرات وتصوير ورق وملخصات ، بعد عناء فترة كاملة ، بما فيها من صداقات جديدة ، وعداءات عنصرية بغيضة ، ومن كثرة الشيكولاته إللي أكلتها ، أصبحت وكانها من مقاتلي الجنجويد ، ما أكبرها من فرحة عندما يجد الأب والأم ثمرة هذا الكفاح تنمو وتترعرع ، و تثمر وها هو قد جاء الوقت لجني وقطف ثمرة هذا المجهود والتعب وسهر الليالي ، وعندما يجد الابن فرحة أبويه وتشجيعهم ، ويجد كل أقربائه يحضرون في فخر حفل تخرجه بعد هذه المسيرة الطويلة، لم تصل إلا بفضل الله إلى ذلك اليوم ، وترتسم أمام عينيها مستقبل زاهر مشرق ، مليء بكل الخير والحب والسعادة، وفي ختام هذه المرحلة المهمة وبعد حفل تخرج كبير قامت بدور رئيسي في العرض ، أخيراً تخرجت بيسان من ال KG1 .

وإذ نكن كل الشكر لحضانة نجوم المستقبل، وعلى رأسهم مديرة المدرسة ، مس هدى ، ومس شيرين ، ومس منى ، ومس سها، ومس لورا ، ومس خضرة، ومس دُنيا .


فإننا نوجه لهم التحية وندين لهم بعد الله بما وصلت إليه بيسان من معرفة ومعلومات وخبرة حياتية ومعلوماتية متميزة.









* * * * * *


وقفت في إشارة مرور ، فبدأت في مناغشتي، وطلبت منها الهدوء علشان الإشارة هاتخضر ونمشي،
بيسان : يعني أيه ؟
انا : يعني الإشارة لما تبقى حمرا.. ا أأ ، يعني لازم تبقا خضرا علشان .. ممم ..بأقول لك ايه ..مش هاتفهمي نظام الاشارة دلوقت.. بعدين بعدين.
بيسان : شو مابفهم ! أنتِ (بصيغة المؤنث) اللي ما بتفهمي ، وأكملت منشدة



The light is green the car can go
The light is green the bus can go
The light is red stop stop







حوار ثنائي بيحصل في الكرسي الخلفي في السيارة
أحمد : بابا، بيسان ضربتني بالقلم على وشي .
بيسان : لا ماضربتوهوش بالقلم
أحمد : ضربتني يا بابا
بيسان: واللاه واللاه .. ماضربتهوش بالقلم
أحمد : ماتكدبيش يا بيسان
بيسان .. انا مو بكدب ..انتِ بتكدبي.. والله ماضربتوهش بالقلم ...انا مو معي قلم ...انا ضربته بأيدي .



مع السيدة/هدى مديرة المدرسة




يوم الأجازة ما أجملها من ساعتين نوم زيادة،لكن ليس كل ما يتمناه المرء يدركه ، استيقظت هي في ميعادها، ويا دوب لمحت عيني انفتحوا وانغلقوا تاني..
وسألتني..بابا.. ممكن العب بالمعجون(الصلصال) ...
جاوبتها براسي بالايجاب ...امم ،
هي تاني : بابا..انتي بتحبي المعجون..
انا(خايف النوم يطير من عيني) : أمم..
هي :طيب تعالي العبي معايا.. ...
انا(اللهم طولك يا روح) : لا عايز انام...
هي (بعصبية ): كل يوم نوم كل يوم نوم.. انت مش قلتي بتحبي المعجون... أنا سمعتك .. عايزة تنامي ليه ، يالا قومي العبي معايا.




لان الله موجود في كل مكان ، ولابد ان يعامل المرء الناس وكأن الله يراه دائما ، فقد علمتها ان الله موجود في القلب ، ونحن نراعي ما نقوم به من أعمال تصدر عن القلب ... الذي يحيى بذكر الله.
نشيد تعلمته في المدرسة:
يا عصفور يا صوغير ...مين لبسك ريش ؟؟
يمكن ماما... لا .لا .لا
يمكن بابا....لا .لا .لا
هو الله ...رب العالمين


انا : برافوووو بيسان... قولي لي بقا ...فين الله.....!؟
هي (مشيرة إلى صدرها) : الله في القلب...
انا : شاطرة حبيبتي...
هي (للتأكيد) : اه ..في القلب..مش في البطن .




بيسان: هي مدينة فلسطينة معناها في اللغة السريانية بيت شان ...أي بيت الهدوء و السكون



ماشاء الله لا قوة إلا بالله

Posted by أُكتب بالرصاص :: 12:12 PM :: 52 Comments:

Post / Read Comments

---------------oOo---------------

May 21, 2007

الرضاعة الطبيعية

والفتوى اللي هيه

اللي يعيش ياما يشوف ، واللي يبص على الازهر يسمع ويشوف أكتر وأكتر من العجايب ، وبعد فتوى الدكتور عزت عطية ،التي يستشهد فيها بإرضاع الكبير ، ويحث الموظفات على إرضاع زملاء العمل حتى يكونوا في مأمن بالخلوة الشرعية ، خمس رضعات مشبعات ، ومطالبا بتوثيق الارضاع ينص فيه أن فلانة بنت فلان أرضعت فلانا ابن علان ونشهد الله على ذلك ويوقع الشهود. جه في بالي ان الرضاعة ممكن تكون من كوب او ما شابه ، لكن الدكتور عطية أكد أن الإرضاع يكون بالتقام الثدي مباشرة، وأضاف فضيلته ،أنه لو كان الرئيس الامريكي السابق بيل كلينتون قد رضع من ثدي متدربة البيت الابيض مونيكا لوينسكي لانحلت مشكلة الخلوة الشرعية بينهما وما ترتب عليها من مشاكل أخلاقية لانها كانت ستصبح أخته في الرضاع وبالتالي تحرم عليه .
يعني اي أزهري تشعش معاه يطلع فتوى ، ... أكتب بالرصاص تخيل ورصد تداعيات مثل هذه الفتوى على مجتمعنا..وخرج بالاتي :

- من هنا ورايح هنلاقي واحد بيسأتذن بدري من مديره، ولما يساله رايح فين ... هايقول له ..أنا واخد إذن ....عندي ساعة رضاعة .

- طبعا هايطلع لنا موظف عينه فارغة بيستهبل وسايق العبط ، ويقولك ..انا لسه ماشبعتش .. والفتوى بتقول..خمس مشبعات....خلينا قاعدين بقا معطلين مصالح الخلق..لغاية حضرته ما يشبع .

- إنشاء إدارة في كل مصلحة وهيئة حكومية نسميها إدارة الحلب، أو المحلبة..او إدارة البقرة الحلوب يتم فيها إدرار اللبن ، وياريت جنبها نخصص غرفة لتربية الدجاج ، ومعمل زبادي

- سيتم وقف صرف وجبات الغدا على الموظفين...الله ..طب ويحتاجوا الغدا ليه ..هو فيه احسن من لبن الأم .وخصوصاً لبن السرسوب ؟! كما سيتم تغير مسمى الراحة من launch break إلى feeding breast break ..

- طلبة المدارس والجامعات يتظاهرون مطالبين بتطبيق الفتوى في المدارس والجامعات .

- قرار إداري بتعيين السيد الموظف/ قرني أبو إريال مسئولا عن تنظيم عملية تحليل الخلوة الشرعية بين المكاتب ، وعلى المعنيين الالتزام بالتنسيق معه في هذا الشأن .
- قرار إداري أخر بتوزيع العمل بالتساوي بين السيدة/عنايات المفش ، والسيدة / رشا منير ، بعدما تبين تزاحم الموظفين والمراجعين على مكتب السيدة رشا وهجر مكتب السيدة عنايات.

- مساكين الموظفات اللي شغالات في مجمع التحرير . هايجيبوا وقت منين لإرضاع كل هذا الكم من الموظفيين الذي يقدر عددهم ب سبعتاشر ألف موظف محتاجين للرضاعة ؟ وبالتالي ساعات عمل إضافية .

- وسيضطر المسئولين إلى تعيين موظفات جدد علشان يعوضوا النقص في عدد المرضعات في المصالح المزدحمة بالموظفين .
- سيصبح من مسوغات التعيين للمراة ..شهادة تثبت إنتاجيتها ..كام لتر في الساعة .مع شهادة صلاحية وتاريخ إنتهاء.

- حوار
- انت ياختي مش فطمتي المحروس حمادة وبقا في كي جي وان ..امال الحليب لسه ماوقفش ليه.. أيوة يا اخوتشي حمادة انفطم من سنة ، بس عبمنصف أفندي لسه بيرضع .

- حوار أخر
- ياختي أنا حيلي أتهد انا هألاحق على مين والا مين ..رضاعة في الشغل ورضاعة في البيت!!! العالم انفجعت .

- حوار تالت
- هو الموظف المسئول فين ؟ احنا عايزين نخلص مصالحنا
- البيه المسئول بيفطر وهايشرب الشاي وياخد الرضعة بتاعته ويشوف مصالحكم يا بهوات .

- سيتم تعليق يفط على بعض الغرف، مكتوب عليها.....ممنوع الدخول ...منطقة رضاعة طبيعية .

Posted by أُكتب بالرصاص :: 6:34 PM :: 63 Comments:

Post / Read Comments

---------------oOo---------------

May 17, 2007

منطقة الهرم..من عجائب الدنيا

مستر حواس وعلماء الآثار المصريين مستاءين من مسابقة عجائب الدنيا الجديدة احتراما وتقديرا لمكانة الأهرام التاريخية... وطبعا نحن نؤيدهم في استيائهم، وإحنا كمان مستاءين لنفس السبب، ومستاءين كمان لأسباب أخرى، لان الأهرام لازم تفضل العجيبة الوحيدة الباقية من عجائب الدنيا.
لانه من الصعب أن تجد في العالم أجمع كل هذه الأشياء التي تراها في منطقة الأهرامات ، وكلها من العجائب.

• أول ما يقابلك في الهرم ، على الإشارة ..تدافع عليك سماسرة الخيل والبغال والحمير..لتركبوها.. يتخطفون السائح من المواصلات علشان يركب جمل أو حصان النص ساعة بميت دولار.. مع انك لو حبيت تشتري الحصان..مش هاتدفع فيه الميت دولار دول..
بس هي دي ثقافة تنشيط السياحة عندنا، نظام ..."احلب الزبون" ..هوا يعني هايجي تاني. دي فرصه، وطظ في سمعة السياحة.
• كشك قطع التذاكر... لازم يكون متجانس مع الموقع ، لذلك تجده كشك من الحجارة تيمنا بالأهرام..تظنه من بعيد مكان لبيع سجائر البانجو، مستحيل تلاقي مكان سياحي في العالم كله مدخله عبارة عن كشك من الحجارة ، يجلس فيه أتنين فقط من الموظفين ، وطابور السائحين يقف أمامهم في الشمس المحرقة ، كما انك أبدا لن تجد فكة إما أن ينتظر في الشمس يا يقول له ..خلاص keep it ، كما أن التفرقة في السعر بين الأجنبي والمصري كبيرة جدا، على الرغم من أن السائح ممكن يدخل من غير تذاكر خالص، و بخمسة جنيه يدفسها في إيد الست اللي واقفة عند البوابة بتراجع تذاكر الدخول تعتبره مصري..ومن باب الشعرية كمان.
بأسال نفسي.. علماء الآثار(المستاءين) هايخسروا أيه إنهم يوصوا ببناء مكان فسيح مكيف ينتظر فيه السائحين ويوفروا عشرة خمستاشر موظف يقطعوا التذاكر !!!
• على السائح أن يمشي تحت هذه الشمس مسافة لا تقل عن 500 متر يصارع الحر ، ويهش الدبان ، ويعاني الإجهاد ، ويهش سايس الجمال أو الخيل، اللي مش ممكن يسيبه ويفضل ماشي وراه يعرض عليه كأنه مديون له ولازم يدفع اللي عليه بكل لزاجة، ويخلص من واحد يقع في التاني.. وتقوله يا عمنا..دا سايح... خليه يستمتع.يقوللك...احلب الزبون.


• المنطقة باثرها مافيهاش شجرة واحدة السائح يحتمي بها من حر الشمس، يعني بصراحة تعذيب للسائح ... هل تـُعتبر إهانة اننا نخضر المنطقة كلها ،أو نعمل حديقة صغيرة أو نعمل كبائن مكيفة للاستراحة ، ونرجع نلوم السواح انهم بيمشوا عندنا بلابيص.. طيب وفروا لهم الكلة..قصدي.. الظلة..ويا عيني بقا لو عطشان ومش عامل حسابه، ويدور ساعتها بحسن نية على محل نظيف أو market صغير ...مش هايلاقي غير عم بعرور ماسك له الجردل الوسخ ويقول له .. بل يور ماوس يا إكسلانس.. إزازة المية بعشرة باوند... نقول سائح ...يقولك أحلبوه !!
بس هي غلطة الفراعنة...يعني رايحيين يبنوا الأهرامات في اخر شارع الهرم في الصحرا... ماكانوا قربوا شوية وبنوها في وسط البلد جنب حديقة الأزهر ، أو الحديقة الدولية في مدينة نصر أو حتى في ميدان فيكتوريا بشبرا.
ويا سلام بقا لو الزبون اتزنق وعايز يعمل زي الناس .. ماقداموش غير حل من أتنين .. يا يعملها على نفسه ، يا يصبر ويجي له تسمم بولي ، أو انه وراء أي حجر من حجارة التاريخ يعملها ويفك زنقته...وفيها ايه...ما المنطقة كلها مليانة من خرى البهايم والجمال.

خلال الجولة في هذه المنطقة المهيبة والبقعة الفريدة من العالم ، لن يسلم السائح من ملاحقة البائعين الجائلين ، اللي يبيع له تماثيل مقلدة، واللي يبيع له غترة وعقال، واللي عايز يبيع الهرم نفسه ، وكلوا ماشي.. يورو دولار استرليني ين ريال سعودي.. وكمان معانا ماكينة فيزا وماستر كارد محمولة. المهم تحلب الزبون ،وكلوا تحت سمع وبصر رجال الامن اليقيظين دائما

• بمجرد ما يخلص السائح جولته وينزل على ابو الهول، ومنها على باب الخروج من ناحية نازلة السمان، أكيد هايكون طلع عين اهله ولعن سنسفيل أم الحضارة ، ونفسه في حتة مكيفة ، أو جعان وعطشان كانة راجع من الصحرا... هايلاقي المطاعم الامريكية فاتحة له دراعتها، كنتاكي وهارديز، اللي هو أصلا زهقان منها،

لذلك هايقرر انه ياكل حاجة تراديشينال... هايمشي مجرد خطوتين بعيد عن المنطقة السياحية.. هاينزل على نزلة السمان، هيلاقي عم عشماوي بتاع الفول والفلافل.. وهيلاقي تلاجة الحاجة الساقعة بتاعة المعلمة فوزية،


مع شوية روايح تراديشينال نابعة من الزرايب بتاعة الخيل، وممكن يعدي الكوبري على ترعة المنصورية علشان يركب من شارع الهرم..وتستوقفه هذه الحادثة التراديشينالية ..اللي مش ممكن يشوفها في بلده.

المعاملة والثقافة التي تجدها في هذه المنطقة من العالم ، اسؤ ما يمكن ان تفرزه سبعة آلاف سنة حضارة، دي مش ممكن تكون أسبوعين حضارة بالكتير قوي ، مافيش ثقافة الاستمرارية ، مش مهم السايح يجي تاني والا عنه ماجه.
نقول للعلماء المستائين احتراما وتقديرا للأهرامات، لازم تحترموا السائح ، لازم تعلموا كل من يتعامل معه انه يحترمه ، وكمان لازم تحترموا نفسكم ...وتسكتوا أحسن .

Posted by أُكتب بالرصاص :: 9:03 AM :: 43 Comments:

Post / Read Comments

---------------oOo---------------