أُكتـــب بالرصـــــاص

Jun 3, 2007

خادمة وحاجات تانية



اسمحو لي اختلف مع المعارضين لفكرة تصدير الخادمات إلى المملكة العربية الشقيقة ، فانا اعتبره قرار صائب من الوزيرة ، التي باتفاقية واحدة ، أثبتت انها تنفع وزيرة اقتصاد مش قوى عاملة ، لانها أوجدت حل لمشكلة كبيرة ، وهي المشكلة الاقتصادية في البلد ، ومستقبلا سنعرف بعد نظر الوزيرة في نعنشة الاقتصاد المصري،
يعني بالإضافة إلى المائة وعشرون ألف قطعة (دي البداية والحبل عالجرار) اللي هانصدرهم للمملكة ، دا معناه انه سيتم إنقاذ مائة وعشرون ألف أسرة من الجوع .. ( على أساس تجوع الحرة ولا تأكل بثديها ) ومع إصرار الوزيرة إن الحرة لازم تاكل بأي طريقة علشان الجوع مش كويس على صحتها وممكن يجيب أنيميا....وكذلك رأي بعض الفقهاء إن الجوع والعياز بالله ... كافر ، خد عندك :

* إغراق السوق المصرية بالعملة الصعبة ، بطريقة سهلة ، مما يعني انتعاش سوق محلات الصرافة و وسترن يونين، ودا طبعا حسب النظرية الاقتصادية اللي درسناها في الكليات إن "الساعة بخمسة جنيه والحسابة بتحسب ".

* عودة الانتعاش لشارع عبعزيز من جديد..بعد ما كل واحدة ترجع في إجازتها السنوية معاها كاسيت بروحين ، ومعاها مروحة أو مكنسة .. تبيع واحدة وتخلي واحدة ، مما سيعود بالفائدة على سوق الأجهزة الكهربائية .

* الخير اللي سيعود على المستشفيات الحكومية والعيادات من مدخول رسوم الكشف على البنات قبل السفر لضمان خلوهن من الأمراض المستعصية والمستوطنة والكبد الوبائي ، أومال ايه ..احنا لازم نصدر حاجة نضيفة وعلى الفرازة وبضاعتنا لازم تدخل سوق المنافسة ، وكمان الكشف عليهن بعد العودة لضمان خلوهن من الايدز .



* محلات العباية والشيلة الخليجية ، ستجد سوقا جديدا في مصر ، مما يعني حركة سوق القماش وحل مشكلة شركة الغزل والنسيج والإبقاء على العمالة بها .... شفتوا إزاي إن الخير على صدور الخدامين ... قصدي ورود القوادين ....يوووه ...على قدوم الواردين .


* انتعاش سوق معاهد اللغات ومدرسي الإنجليزي، لان البت خضرة والبت شلبية لما سمعوا عن القرار ..جريت تاخد كورس انجليزي علشان تقدر تلحق بالعمالة وتصبح من الطلائع ، وترفع علم مصر في السعودية... امال ايه ... هما دول ولادك يا مصر... ساعة الجد... ميوقفهمش حد .

* مكاتب وسط البلد للسياحة ، هتغير نشاطها لتصبح مكاتب استيراد وتصدير ، والبضاعة حاضرة ، وموجود كل المقاسات والانواع ، وكل محافظة وليها سعر، وعاين قبل ما تدفع ، ونحن نستبدل البضاعة خلال الثلاثة اشهر الاولى . وماتنساش ...انا بأسلمك نضيف ..يبقا تسلمني نضيف .

.
* ولان القرار لم ينسى شركات الطيران انها تاخد نصيبها في السبوبة دي.. اشترطت الاتفاقية سفر البنات جوا، وتخيل بقا مائة وعشرون ألف تذكرة سنوياً تدخل خزينة مصر للطيران ! تستاهل بقا والا ماتستاهلش؟

بس ستضطر شركة مصر للطيران من تغيير شكل شعار الشركة من الطائر الحزين، ليصبح شعارها، خروف مدبوح ومتاكل ومتبقاش منه إلا - القرنين - .

* القضاء على مشكلة الدعارة في مصر ، لان معظم الرائدات في هذا المجال سيهاجرن بعقود عمل رسمية إلى الدول الاشقاء ، ومصر هاتنضف ، لان البلد دا طاهر وهايفضل طول عمره طاهر... وسمعني سلام " يا امُ المطاهر رشي الملح سبع مراااات " .

* مكاتب التصوير والمطاعم المحيطة بمنطقة جاردن ستي وشارع القصر العيني ، نتيجة للازدحام على مكاتب السفارة السعودية ، بالاضافة بقا للدخل القومي لإدارة الجنسية والهجرة ، من اصدار جوازات السفر، للتأشيرات ، لضرائب الكادحين بالخارج ، وتصاريح السفر و دمغات وو و و، وأهي كلها بيوت هاتنفتح على حس الخدامات .



يعني إذا غضينا النظر عن الجانب المظلم في الموضوع ، والسمعة السيئة اللي هتلاحقنا كلنا، البلد دي هتاكل ملبن ، ويكون شعار الوزارة مع عيشة عبد الهادي حاول تغمض عنيك أو غمض عينك تاكل ملبن


سيبك من دا كله وخلينا في الجد ، وعلى رأي جدو ، ان العصابة لما تحب تسرق حاجة تفتعل خناقة وهمية علشان تلهي عين الشرطة ، ورشيدة...قصدي حكومتنا الرشيدة بتتبع دايما نفس الأسلوب، وبغض النظر الوزيرة هاتقول ماحصلش.. او ترجع عن قرارها وتقول سامحوني ماكنش قصدي ، لازم في كل مرة لما نلاقي خناقة كبيرة الحكومة عملاها ...نلحق ونحط ايدينا على جيبونا ، ونشوف الحكومة عايزة تسرق مننا أيه ، ونخلي بالنا من انتخابات مجلس الشوري القادمة.

Posted by أُكتب بالرصاص :: 9:38 AM :: 67 Comments:

Post / Read Comments

---------------oOo---------------